Zgjedhjet

Albinot Maloku 

E diela e datës 11 qershor 2017, mund të jetë ditë e ndryshimeve interesante për skenën politike në Kosovë. Zgjedhjet e sivjetme të parakohshme parlamentare, të cilat ndodhën si pasojë e shkarkimit të qeverisë së kryeministrit Isa Mustafa nga Kuvendi i Kosovës përmes votës së mosbesimit, padyshim, janë zgjedhje të cilat edhe mund të prodhojnë legjislaturë e qeveri të vlefshme.

Gjatë kësaj periudhe kemi folur për elementet përbërëse të këtij procesi zgjedhor siç ishin koalicionet e ndodhura, mungesa e programeve dhe platformave të koalicioneve e subjekteve politike garuese. Kemi shtjelluar rëndësinë e votës dhe arsyen e nevojës së shfrytëzimit të kësaj të drejte. Vëmendje i kem dedikuar edhe fushatës zgjedhore e cila mbyllet nesër dhe e cila fushatë, pa dyshim, u konsiderua e qetë.

Ajo që e mbyll këtë seri analizash për zgjedhjet e parakohshme parlamentare të Republikës së Kosovës, e që vlen të shtrohet si pyetje në këtë të premte, është ajo se çka mund të prodhojnë këto zgjedhje?

Zgjedhjet e 11 qershorit për Republikën e Kosovës mund të jenë një fillim tjetër i ndryshimit duke trasuar vija të reja në jetën politike për vendin. Politikat e reja janë të domosdoshme në të gjitha aspektet e fushëveprimit të shoqërisë e shtetit. Për Kosovën, fondamentale ngelet pasja e politikave të reja në luftën e domosdoshme kundër korrupsionit, vendosjen e meritores dhe profesionales si kushtin thelbësor për funksionim të drejtë të ekonomisë, arsimit, bujqësisë, energjetikës, shëndetësisë, kulturës e sportit, diplomacisë e politikës së jashtme. Mund të ndodh vendosja e standardeve të reja të raportit mes shtetit të Kosovës dhe partnerëve ndërkombëtarë, mund të ndodh një fillim tjetër me vija të reja në aspektin e marrëdhënieve të Kosovës me shtetet fqinje, por edhe në botë. Mund të ndodh që mos të kemi përvoja, siç ishin ato ku për mbi gjysmë viti nuk u krijuan institucionet drejtuesve të vendit pas procesit të përgjithshëm zgjedhor. Mund të ndodh më e mira, nëse secili qytetar me të drejtë vote, me 11 qershor del e voton duke shfrytëzuar të drejtën e tij demokratike.

Nisur nga përbërja dhe shtrirja e subjekteve politike garuese, që për këto palë zgjedhje janë paraqitur 5 koalicione parazgjedhore, 19 parti politike e 2 iniciative qytetare, edhe mund të mos ketë shumë befasi në rezultatet e pas zgjedhjeve. Disa paqartësi që i kemi pas nga zgjedhjet e kaluara, Gjykata Kushtetuese vetëm se i ka sqaruar dhe tani fotografia ligjore e pas zgjedhjeve është e qartë: i pari që del pas zgjedhjeve e nisë angazhimin për formimin e institucioneve të reja. Nisur nga fakti i mos pasjes së pengesave ligjore, deputeti i Kuvendit pas zgjedhjes së Kryetarit të Kuvendit mund të manovrojë krejtësisht i pavarur me qëndrimin e tij politik, pavarësisht se ka hyrë nga ndonjë subjekt politik. Po, ashtu edhe koalicionet e lidhura parazgjedhore nuk mund të konsiderohen garant të mos ndryshimit të raportit mes subjektit politik që ka dal i pari pas zgjedhjeve dhe atyre koalicioneve.

Ky shpjegim u bë për të treguar se asgjë nuk është më befasi në skenën politike të vendit. Mirëpo, çështja është se çka mund të prodhojnë këto zgjedhje? Në nivelin e dëshirave të qytetarëve mund të jetë fitorja e deputetëve “cilësor”, që do ta përbënin legjislaturën e ardhshme. Pra që të kemi deputetë që do të shquheshin si për angazhimin e tyre profesional,  deputetë që janë shquar me punën e tyre edhe në të kaluarën, nëse u kanë takuar legjislaturave të kaluara, apo nëse janë shquar me veprimtarinë e tyre para futjes në politikë. Emrat e subjekteve politike janë këto që janë, e këta emra partish do të na ndjekin për sa kohë kemi pluralizëm e sistem zgjedhor, dhe këtu nuk ka asgjë të keqe. Subjektet aktuale politike kanë ofruar emra deputetësh prej atyre që nuk e kanë merituar as të jenë në listë e lëre më të marrin votën tuaj, e deri tek emrat që tashmë veç duhet të zgjedhën deputetë e që nuk kanë qenë kurrë të tillë.

Këto zgjedhje mund të prodhojnë edhe kriza politike edhe kriza që mund t’i bëjnë serbët faktor sa për të tentuar edhe pozitë kryeministri dhe jo kjo si pasojë e mundësisë reale të tyre, sa si pasoj e kokëfortësisë së liderëve politikë shqiptarë. Vijat e kuqe nuk nisin asnjë fillimi të mbarë, mirëpo fillimi i mbarë e me ndryshime të reja ndodh kur nuk ka vija të kuqe, por vija unifikuese, e këto duhet të unifikohen me 12 qershor. Pra, këto zgjedhje mund të prodhojnë gjithçka pozitive, por edhe gjithçka të pa duhur për Republikën e Kosovës.

Kategoritë
ANALIZA JAVORELajmet Kryesore

Të ngjajshmet