Vedat Muriqi ka pranuar ofertën e klubit anglez

Fenerbahçe do ta ketë shumë të vështirë të mbajë në skuadër Vedat Muriqin këtë verë.

Bomberi i Kosovës është shndërruar në një objektiv të disa ekipeve të kampionateve të mëdha.

Para pak ditësh mediat angleze raportuan për një ofertë të West Bromwich Albion për Muriqin, që nëse bashkohej me ta do të kishte mundësinë të luante në një kampionat si Premier Liga.

Në Turqi zbulojnë më shumë detaje rreth këtij operacioni dhe është e përditshmja “Aspor”, që zbulon se ka një marrëveshje verbale mes Muriqit dhe trajnerit të WBA, Sllaven Bilic.

Kjo medie mëson se ka patur një bisedë mes Muriqit dhe trajnerit të njohur ballkanas.

Bilic i ka premtuar një rol të rëndësishëm në skuadrën e tij dhe i ka shprehur vullnetin e madh për ta patur në skuadër 26-vjeçarin.

Nga ana tjetër Muriqi duket se është bindur nga kjo ofertë dhe ka pranuar të vazhdojë bisedimet, duke i bërë të qartë trajnerit të anglezëve se do i duhet të bien dakord me Fenerbahçen në lidhje me vlerën e transferimit të tij.

Pritet të shihen zhvillimet e ditëve në vazhdim, por duket se Muriqi nuk preferon të shkojë në një klub të madh dhe të vuajë për të gjetur minuta, por të jetë lider në një klub, që sezonin e ardhshëm kthehet në Premier Ligë, pasi këtë edicion e ka kaluar në Championship.

Kategoritë
Sport

Të ngjajshmet