Në ceremoninë e hapjes morën pjesë kryetari i TİKA-s, Abdullah Eren, Ambasadori i Turqisë në Prishtinë, Sabri Tunç Angılı, Koordinatori i TİKA-s në Prishtinë, Fulya Aslan, Zëvendës Kryetari i Komunës së Prishtinës, Florian Dushi, si dhe përfaqësues të institucioneve turke në vend, drejtues të shkollës, mësues dhe fëmijë.
Në fjalën e tij, kryetari i TİKA-s, Abdullah Eren, theksoi se organizata ka realizuar projekte në më shumë se 170 vende të botës dhe mbi 850 projekte në Kosovë që nga viti 2004, përfshirë mbi 160 projekte në fushën e arsimit. Eren u shpreh:
“Në këtë institucion 280 fëmijë ndjekin mësimin. Të mund të krijojmë një hapësirë lojërash që kontribuon në zhvillimin e tyre dhe i bën ata të duan më shumë këtë kreş është një gëzim i madh për ne. Ne e dimë se këta fëmijë, kur shohin flamurin turk dhe yllin e tij, do të kujtojnë Turqinë gjatë gjithë jetës.”
Ambasadori turk në Prishtinë, Sabri Tunç Angılı, e përshkroi marrëdhënien mes Turqisë dhe Kosovës si miqësore dhe vëllazërore. Ai vuri në dukje përpjekjet e TİKA-s jo vetëm në Kosovë, por edhe nëpër botë për të sjellë buzëqeshje tek fëmijët, përfshirë ato në Gaza dhe Sudan.
Drejtuesja e Yllkat, Rifadije Sopi, tha se bashkëpunimi me TİKA-n është një shembull i miqësisë mes dy popujve. Sopi shtoi:
“Krijuam një dimension të ri kulturor dhe arsimor për fëmijët tanë, duke forcuar lidhjet mes dy popujve dhe rritur ndërveprimin social mes dy kulturave.”
Ajo po ashtu bëri të ditur se që nga viti 2020 në institucion funksionon një klasë turke për fëmijët nga 1 deri në 4 vjeç, ndërsa edhe fëmijët e tjerë të komunitetit turk ndjekin mësimin së bashku me bashkëmoshatarët e tyre.
Zëvendës Kryetari i Komunës së Prishtinës, Florian Dushi, vlerësoi kontributin e TİKA-s që nga viti 2004 në zhvillimin e Kosovës, përmirësimin e infrastrukturës arsimore dhe shëndetësore, mbështetjen e bujqësisë dhe ruajtjen e trashëgimisë kulturore.
Ceremonia përfundoi me një performancë kërcimi nga fëmijët dhe prerjen e shiritit të hapjes së parkut të lojërave.
