“Ri-globalizimi është shenjë dalluese e botës pas COVID-19”

Në një intervistë ekskluzive për AA, ministrja e Jashtme e Spanjës, Arancha Gonzalez Laya i bën thirrje BE-së dhe Turqisë të ndërtojnë besim të ndërsjellë.

Turqia dhe Spanja kanë vendosur të zgjasin axhendën e tyre të Aleancës së Qytetërimit për 15 vite të tjera për të adresuar çështje të tilla si ksenofobia dhe diskriminimi në shoqëri.

Në fund të vizitës së saj të parë jashtë Bashkimit Evropian (BE) pas masave të bllokimi të COVID-19, ministrja e Jashtme e Spanjës, Arancha Gonzalez Laya në një bisedë ekskluzive për Anadolu Agency (AA) në Ankara tha se të dyja vendet kanë rënë dakord të investojnë pak më shumë në ripërcaktimin e një axhende pozitive të Aleancës së Qytetërimit për 15 vitet e ardhshme, duke diversifikuar atë më tej për të luftuar ekstremizmin.

Në vazhdën e ngjarjeve tragjike të 11 shtatorit, të dyja vendet kishin vendosur axhendën e quajtur Aleanca e Qytetërimit për të përballuar teorinë e Përplasjes së Qytetërimeve për të parandaluar një reagim kundër muslimanëve në të gjithë botën.

“Axhenda është zgjeruar. Dhe ajo që ne kemi rënë dakord sot të investojmë pak më shumë në ripërcaktimin e një axhende pozitive për 15 vitet e ardhshme bazuar në përvojën e 15 viteve të fundit”, tha ajo.

Laya tha se ajo ishte në kontakt me homologun e saj turk, Mevlüt Çavuşoğlu gjatë krizës së pandemisë së COVID-19. Spanja ishte një nga vendet më të prekura me 272.421 raste të konfirmuara dhe 28.432 vdekje si pasojë e COVID-19.

Ministrja spanjolle tha se ajo dëshiron të fillojë turneun e saj të jashtëm jashtë BE-së nga Turqia pas bllokimit të COVID-19 për të diskutuar disa çështje si riatdhesimi i shtetasve, zhvillimet në Mesdhe, Libi dhe Siri.

Anadolu Agency: Një Plan i Përbashkët i Veprimit u nënshkrua në mes të dy vendeve në vitin 1998. A ka funksionuar ky plan mirë për të vendosur bazat e marrëdhënieve bilaterale apo ka ardhur koha për rishikimin e saj bazuar në rrethanat aktuale?

Arancha Gonzalez Laya (AGL): Ajo ishte atëherë, kurse kjo është tani. Ajo që mund të them është se marrëveshja ishte shumë e dobishme për të çimentuar marrëdhëniet shumë të thella që ka Turqia me Spanjën, jo vetëm në aspektin ekonomik, me një shkëmbim prej 12 miliardë dollarësh çdo vit me një tepricë të mirë në këtë tregti, për më tepër, në favor të Turqisë dhe investime shumë të mëdha nga ndërmarrjet spanjolle në këtë vend.

Por, jo vetëm në aspektin ekonomik dhe tregtar, por ekziston edhe një dialog i thellë midis ministrive tona të Mbrojtjes. Ne kemi një dialog midis ministrave tanë të Brendshëm. Ne kemi një dialog të rregullt midis ekipeve të ministrive të Jashtme. Kemi bashkëpunim në fusha si turizmi apo shëndetësia.

Pra, është shumë e gjerë dhe është rritur me kalimin e kohës, jo vetëm midis qeverive, por edhe bashkëpunimi midis qyteteve. Ekziston një trajnim shumë interesant i binjakëzimit me qytetet në Turqi, Ankara, Stamboll, Konya, Antalya dhe qytetet simotra në Spanjë, ku bashkëpunimi nuk është vetëm midis qeverive, por edhe midis qyteteve dhe studentëve. Shumë studentë spanjollë duan të vijnë në Turqi për të bërë Erasmus-in dhe shumë studentë turq duan të shkojnë në Evropë dhe për Erasmus vijnë në Spanjë. Pra, bashkëpunimi dhe lidhjet janë shumë të gjera dhe të thella. Kurse ajo që ne duam të bëjmë është t’i thellojmë ato edhe më shumë sepse shohim nga të dyja palët se ka mundësi që mund të shfrytëzohen edhe më mirë.

– Kërkohen më shumë kontakte midis Turqisë dhe Spanjës 

Pyetje: A mendoni se shoqëritë turke dhe spanjolle e njohin njëra-tjetrën sa duhet? Mund të flisni për hapat e ndërmarrë deri më tani drejt këtij qëllimi?

AGL: Le të themi se mund të njiheshim më mirë. Kurse kjo kërkon më shumë kontakte. Këto kontakte duhet të jenë në nivelin kulturor. Në nivelin sportiv. E di që ky është një vend që e do futbollin. Është një dialog që duhet të bëhet me qendrat e mendimit, me gazetarët, me studentët, me bizneset. Ajo që duhet të bëjmë është të thellojmë kontaktet midis shoqërive tona. Ne i quajmë kontakte midis njerëzve sepse kjo është garancia më e mirë që në fund të ditës do të njihemi më mirë. Dhe, kur njeriu njihet më mirë me njëri-tjetrin, marrëdhëniet e tyre janë më të buta. Kur ka vështirësi është më e lehtë t’i menaxhosh ato sepse ne kemi kuptuar më mirë dëshirat dhe aspiratat e palës tjetër.

Pyetje: Turqia zhvillon një luftë shumë-dimensionale kundër organizatave të ndryshme terroriste si PKK/YPG, DEASH dhe FETO. Si e shihni këtë luftë e cila përfshin sigurinë evropiane?.

AGL: Ne jemi një vend që dimë pak për terrorizmin sepse kemi vuajtur vetë nga ajo. Pra, është një çështje ndaj së cilës ne jemi të ndjeshëm. Kjo është arsyeja pse ne ndajmë për shembull me Turqinë, në luftën globale, bashkëpunimin ose luftën globale kundër DEASH-it. Ky është vetëm një shembull se ku ne punojmë së bashku. Ne gjithashtu bashkëpunojmë shumë brenda Kombeve të Bashkuara (OKB) për të luftuar kundër terrorizmit në të gjithë botën. Kjo është një çështje ku ministritë e Brendshme të të dyja vendeve janë në dialog, i cili ndoshta mund të thellohet edhe më shumë.

Pyetje: Çfarë dëshironi të thoni në lidhje me zhvillimet në Libi? Në një deklaratë, kohët e fundit ju thatë se BE-ja duhet ta konsiderojë Mesdheun Lindor një vend më strategjik. A mund të elaboroni më shumë rreth kësaj deklarate? Nëse kjo do të lehtësonte shqetësimet e Turqisë apo do të shkaktonte konfrontim të mëtejshëm midis Turqisë dhe BE-së?

AGL: Së pari, Deti Mesdhe është deti ynë i përbashkët. Ne e ndajmë atë me Turqinë. Ne e ndajmë atë me Qipron greke, Libinë, Italinë, Francën, Algjerinë dhe Marokun. Të gjithë e ndajmë këtë det dhe për këtë arsye jemi të gjithë përgjegjës të garantojmë se ka siguri dhe prosperitet në Mesdhe. Kjo është arsyeja pse ne jemi të shqetësuar në Spanjë nga ajo që po ndodh në Libi, sepse është një kërcënim për sigurinë e Mesdheut dhe për këtë arsye është një kërcënim për sigurinë e Spanjës. Kjo është arsyeja pse ajo që ne kërkojmë dhe ky është mesazhi që unë solla këtu në Ankara, është një thirrje për të patur një armëpushim të pakushtëzuar nga të gjitha palët e përfshira në konfliktin në Libi. Dhe të kërkoj nga palët në Libi të kthehen në tryezën e bisedimeve për të negociuar një zgjidhje politike nën kujdesin e OKB-së në Procesin e Berlinit.

Kjo është ajo që ne do të dëshironim të shohim se përgjigjja është në duart e libianëve. Ajo që duhet të bëjmë është të sigurojmë që libianët, të inkurajohen që të ulen në tryezën e bisedimeve dhe të gjejnë një zgjidhje që do t’i përfshijë të gjithë. Ndërkohë, ne jemi gjithashtu shumë të ndjeshëm në Evropë dhe në Spanjë. Ne e ndajmë këtë ndjeshmëri për të siguruar që embargoja e armëve që u ra dakord nga OKB-ja do të respektohej nga të gjitha palët. Kur them gjithçka, mendoj, të gjitha, nëse armët vijnë nga deti, përmes ajrit ose tokës. Ne mendojmë se është e rëndësishme të respektojmë angazhimin që kemi marrë të gjithë në OKB për të parandaluar rrjedhën e armëve.

Pyetje: Cili është mekanizmi për këtë? Sepse Libia është një vend i madh që ka kufij detarë gjithashtu kufij tokësorë të pakontrolluar me vendet e tjera afrikane duke filluar nga Egjipti, Sudani, Çadi dhe vendet e tjera?

AGL: Ne në BE donim të jepnim kontributin tonë modest drejt respektimit të embargos së armëve. Për këtë, ne kemi rënë dakord të krijojmë një operacion të quajtur Irini, i cili ka për qëllim të sigurojë që përsëri përmes detit, ajrit dhe kontrollit të tokës duke përdorur anije të mëdha dhe të vogla, avionë dhe satelitë, të sigurojmë dhe respektojmë embargon. Sigurisht, ky është vetëm një kontribut. Ajo që na duhet është një angazhim nga ana e të gjithë nënshkruesve të kësaj embargoje të armëve të OKB-së që ta respektojnë atë. Dhe është e rëndësishme sepse kjo mund të jetë një mënyrë e mirë për të inkurajuar palët të kthehen në tryezën e bisedimeve.

– Lufta e Spanjës kundër pandemisë

Pyetje: Cilat janë masat precize që qeveria spanjolle ka bërë për të penguar përhapjen e COVID-19 pasi sezoni i turizmit është hapur dhe miliona njerëz nga Britania e Madhe ku shkalla e infeksionit po ndryshon vazhdimisht vizitojnë vendin tuaj gjatë verës?

AGL: Pandemia është kontrolluar në Spanjë. Ne kemi marrë masa për të gjurmuar dhe ndjekur qytetarët e infektuar, gjurmuar kontaktet e tyre dhe izoluar ata që janë pozitivë. Kemi siguruar distancë të ashpër sociale, që të mbrojmë fqinjët e tyre. Por ne gjithashtu e dimë, si çdo vend tjetër në botë që përveç nëse dhe derisa të ketë një vaksinë ose trajtim, ne do të jetojmë me COVID-19 brenda shoqërive tona. Masat janë shumë të rrepta, por ne nuk mund të parandalojmë që të ndodhin shpërthimet. Dhe kur ato ndodhin, ajo që ne bëjmë është të izolojmë ato raste. Ndonjëherë është një rrugë, ndonjëherë është një fshat, ndonjëherë është një rajon. Ajo që ne po bëjmë saktësisht është të izolojmë problemin në mënyrë që pjesa tjetër e vendit të mund të vazhdojë të jetojë e sigurtë. Përsëri është një përpjekje e madhe sepse çdo rajon në Spanjë është përfshirë në këtë përpjekje bazuar në protokollin që është i zakonshëm për të gjitha rajonet që janë përmbyllur me qeverinë qendrore për të siguruar që Spanja të mbetet një vend i sigurtë meqë ne ende nuk kemi ndonjë vaksinë apo trajtim. Kështu që ne duhet të mësohemi të jetojmë me virusin, por duke u siguruar që virusi të frenohet ashtu siç kemi bërë ne në Spanjë.

Pyetje: Ju mbrojtët idenë që COVID-19 do të sjellë një lloj të ri globalizimi. Si do të ndikonte kjo në rajonin e Mesdheut në veçanti dhe në botë në përgjithësi për sa i përket gjeopolitikës dhe ekonomisë?

AGL: Ajo që pamë me COVID-19 janë disa tendenca që theksohen të cilat ekzistonin edhe më parë. Shohim një lëvizje drejt dixhitalizimit dhe kjo është përshpejtuar. E pamë këtë në arsim. E pamë tek pagesat. E pam ketë tek blerjet në internet. Ne kishim prirjen të dekarbonizojmë ekonomitë tona në praktika më të qëndrueshme të prodhimit dhe konsumit. Kjo është përshpejtuar me pandeminë, sepse ne kemi kuptuar rëndësinë e drejtimit të ekonomive tona më të qëndrueshme. Kuptimi se pabarazitë nuk ishin të mira për demokracitë tona u theksuan më shumë. Ne kemi parë se si ngecja e ekonomive tona ka ndikuar në varfëri. Pra, të gjitha këto tendenca ishin më parë. COVID-19 i ka sjellë këto çështje në një jetë të re. Mendoni se bota e së nesërmes nuk është një botë që do të de-globalizohet. Unë mendoj se është një botë që do të ri-globalizohet. Ne po shohim një ri-globalizim. Energjia që fuqizon globalizimin në të ardhmen është teknologjia. Dhe për këtë arsye të gjithë duhet të sigurohemi që teknologjia është e arritshme, e disponueshme, e përballueshme për të gjithë qytetarët, për të gjitha bizneset dhe se të gjithë qytetarët tanë, të gjitha bizneset tona janë pjesë e kësaj vale të re të globalizimit të quajtur teknologji dixhitale.

– Masat kundër shpërthimit të ri të pandemisë

Pyetje: Cilat janë masat që Spanja dhe BE-ja do të ndërmarrin gjatë rihapjes së kufijve të tyre për të shmangur shpërthimet e reja të koronavirusit?

AGL: Ajo që ne kemi bërë është të sigurojmë hapjen graduale të kufijve dhe duke filluar me vendet që kishin nivele epidemiologjike të ngjashme me ato në Evropë. Kemi dashur të hapim kufijtë jo bazuar në kritere diplomatike ose konventa politike, por duke i parë ato sipas të dhënave epidemiologjike. Ajo që ne kemi në mendje është të luftojmë kundër pandemisë. Për të luftuar kundër pandemisë duhet të jemi të kthjellët dhe të hapemi gradualisht. Së pari, për ata që kanë të dhëna më të mira epidemiologjike. Kështu do të jemi në gjendje të rivendosim lëvizjen në vendet tona duke u siguruar që të mbrojmë shëndetin e qytetarëve tanë.

Pyetje: Spanja është një nga vendet kryesore që mbështet anëtarësimin e Turqisë në BE. Bisedimet janë pezulluar tani. Cila është rruga për të dalë apo ka ndonjë shans për ringjalljen e negociatave? A do të mbështesë Spanja hapat drejt hapjes së kapitujve të rinj në procesin e anëtarësimit të Turqisë në BE dhe përparimin e bisedimeve për liberalizimin e vizave?

AGL: Unë mendoj se ajo që mungon është siguria dhe besimi. Pra, duhet të ndërtojmë besim. Dhe duhen të dy për të ndërtuar këtë besim. Ajo e përfshinë BE-në nga njëra anë dhe Turqinë në anën tjetër. Pra, ajo që duhet të bëjmë është dhe ky është gjithashtu qëllimi i vizitës time në Turqi, të sigurohemi që ne të ndërtojmë besim midis Turqisë dhe BE-së. Në fund të ditës, bisedimet e pranimit, negociatat tona me një vend që dëshiron të bëhet anëtar i familjes së BE-së për të zgjeruar familjen duhet të siguroheni që t’i besoni palës tjetër dhe se pala tjetër ju beson. Kjo është e ndërsjellë. Kështu që unë mendoj se ajo që na duhet dëshpërimisht është të ndërtojmë besim. Besimi ndërtohet jo vetëm duke thënë se bëhet por duke praktikuar. Unë mendoj se kam besim se nëse ekziston vullneti ne do të gjejmë një mënyrë për të vendosur pak më shumë besim në marrëdhëniet tona.

Pyetje: Në një takim të Këshillit të Ministrave të Jashtëm të BE-së në Bruksel, Turqia ishte ndër temat e diskutimit. Ju e përshkruani Turqinë si një fqinj me të cilin BE-ja ka lidhje të privilegjuara dhe është partner i NATO-s, por veprimet e së cilës janë parë me shqetësim “nga blloku evropian. Cilat janë këto shqetësime në lidhje me Turqinë?

AGL: Jo vetëm që Turqia është partnere, por Turqia është gjithashtu një aleate e NATO-s, jo vetëm mike. Në NATO, ju nuk keni miq, keni aleatë. Kjo është shumë më tepër sesa një mik. Ky është dikush me të cilin ndani diçka aq të rëndësishme – siguria juaj. Kjo është ajo që Spanja ndan me Turqinë. Ajo ndan një bateri raketore që kemi këtu në këtë vend që po ndihmon në mbrojtjen e këtij vendi kundër vendeve të treta. Pra, ky është niveli i marrëdhënieve që një vend si Spanja e cila është anëtare e NATO-s ka me Turqinë. Tani, që kemi parë dhe kjo është edhe ajo që kam diskutuar me ministrin Çavuşoğlu, disa lëvizje të njëanshme nga ana e Turqisë kohët e fundit, qoftë ajo në Mesdheun Lindor apo Libi, në fushën e migrimeve. Të gjitha këto janë fusha ku ne ndajmë të njëjtat objektiva që ka Turqia, ku ndajmë vështirësitë. Por, ekziston një shqetësim nga ana e BE-së për disa lëvizje që ka ndërmarrë Turqia. Kështu që unë mendoj se kur ndodhin këto gjëra dhe jam e sigurt që Turqia ka gjithashtu ndjeshmëri për hapat që ndërmerr Evropa, kështu që nuk është një lojë akuzash. Është një lojë për të kuptuar se cila është perspektiva e palës tjetër. Vetëm kur e kuptoni, kur dëgjoni palën tjetër do të keni mundësi të gjeni një rrugëdalje. Përsëri, ajo që jam përpjekur të bëj me ardhjen në Turqi është për të diskutuar me autoritetet turke.

– Emigrimi i parregullt një shqetësim i përbashkët

Pyetje: A mendoni se mbështetja e BE-së ndaj Turqisë në luftën e saj kundër terrorizmit është e mjaftueshme? A merr Turqia mbështetje të mjaftueshme në pritjen e refugjatëve sirianë dhe përpjekjen e saj për t’u marrë me migracionin e parregullt?

AGL: Në të vërtetë Spanja ndan shumë shqetësime që ka Turqia për migracionin e parregullt sepse Spanja është gjithashtu një vend që përballet me sfidën e migrimit të parregullt. Pra, nuk është se ne nuk e kuptojmë se cilat janë sfidat me të cilat përballet Turqia. Kemi të njëjtat sfida, ne përballemi me të njëjtat vështirësi. Unë mendoj se këndvështrimi im i ndershëm është se për të luftuar migracionin e parregullt, mënyra më e mirë për ta bërë këtë është me një ndjenjë të bashkë-përgjegjësisë.

Në dialog me fqinjin tuaj, në një dialog me partnerin tuaj, duke punuar së bashku për të siguruar që kjo të mos ndjehet si problemi që pala tjetër ka ose një problem që keni, por një problem që ndajnë të dyja palët. Kjo është baza për të gjetur një mënyrë për të menaxhuar migracionin e parregullt. Të mos harrojmë se një pjesë e madhe e këtyre migrimeve të parregullta janë në duart e trafikantëve me njerëz, rrjeteve kriminale që po lulëzojnë në mjerimin e qytetarëve të tjerë. Duhet të ketë një sens të madh të bashkë-përgjegjësisë. Në rastin tonë, Turqia me vendet anëtare të BE-së duhet të luftojë këtë rrjet kriminal që po lulëzon në mjerimin e njerëzve. Kjo është ajo që ne mendojmë se duhet të bëjmë. Kjo është sigurisht ajo që ne u përpoqëm të bënim me fqinjët tanë. Kjo është ajo që ne bëjmë me Sirinë, Marokun, Mauritaninë, Guinean dhe Senegalin, duke bërë të ditur se kjo është sfida jonë e përbashkët, nuk është vetëm sfida e Spanjës. Mendoj se është e njëjtë në anën e Mesdheut Lindor. Nuk është vetëm sfida e Turqisë. Kjo është sfida e Turqisë dhe BE-së dhe mënyra më e mirë për ta menaxhuar atë është përmes një dialogu midis nesh.

Unë mendoj se Evropa e kupton solidaritetin e madh që Turqia ka treguar dukshëm me refugjatët nga Siria. Kjo është arsyeja pse Evropa ka mbështetur dhe vazhdon të mbështesë ndjeshëm Turqinë në përpjekjet e saj për të pritur refugjatët sirianë. Unë mendoj se ajo që është e rëndësishme tani është të sigurohemi që të gjithë, Turqia dhe BE, së bashku me disa fqinjë, duke përfshirë edhe Rusinë, të kontribuojmë për paqen dhe stabilitetin në Siri, si parakusht për të siguruar që njerëzit të mund të kthehen me siguri në shtëpitë e tyre. Kjo është ajo ku ne duhet të vendosim kursorin tani, duhet të sigurojmë stabilitetin në Siri që ka munguar prej kohësh dhe që është origjina e shumë prej ngarkesave që Turqia dhe BE-ja ndajnë për refugjatët sirianë.

Pyetje: Ju thatë që mbështetja e vendeve të Amerikës Latine me masa konkrete për t’u rikuperuar pas krizës pandemike duhet të jetë prioritet për BE-në. Cilat masa mendoni se janë të nevojshme për këtë?

AGL: Ne kemi zhvilluar dialog me vendet e Amerikës Latine, shumica e të cilave janë vende me të ardhura të mesme. Dhe një nga vështirësitë që kanë këto vende me të ardhura të mesme dhe që e kanë ndarë me ne është në thelb të sigurohen sa më shpejt që vaksina dhe trajtimi kundër COVID-19 të jenë në dispozicion dhe të kenë qasje tek to.

Ky është prioriteti numër një. Por, prioriteti numër dy është qasja në financa për vendet me të ardhura të mesme. Shikoni vendet që nuk janë më të varfrat, nuk marrin financa me kushte koncesionare. Por, disa vende e kanë të vështirë në mjedisin aktual të brishtë financiar të kenë qasje në kapitalin dhe kredinë e nevojshme për të rritur ekonomitë e tyre si përgjigje ndaj COVID-19. Këto janë dy fushat e mëdha, qasja në vaksina dhe trajtimi kundër COVID-19 dhe qasja në financa, kapital dhe kredi për të dalë nga kriza. Ne jemi duke punuar me vendet e Amerikës Latine dhe do të vazhdojmë të përparojmë këtë axhendë të përbashkët sepse mendojmë se kjo është e rëndësishme. Spanja gëzon një marrëdhënie historike dhe të privilegjuar me kontinentin.

– Aleanca e qytetërimeve kundër përplasjes së qytetërimeve

Pyetje: Në vitin 2005, Spanja në OKB kishte sugjeruar krijimin e një Aleance të Qytetërimeve në kontrast me argumentin e Përplasjes së qytetërimeve, tezë që identitetet kulturore dhe fetare të njerëzve do të jenë burimi kryesor i konfliktit në botën e pas Luftës së Ftohtë. Spanja dhe Turqia ishin angazhuar të punojnë së bashku për të promovuar këtë aleancë të qytetërimeve. Cilët ishin elementet e këtij bashkëpunimi dhe sa e rëndësishme është në rrethanat aktuale? Tani 15 vjet më vonë, çfarë përparimi është arritur lidhur me këtë çështje?

AGL: Ne kemi vendosur axhendën e Aleancës së Qytetërimeve 15-vjet më parë. Ishte një trajnim që kishte shumë lidhje me 9/11 (11 shtatorin) dhe parandalimin e një reagimi kundër muslimanëve. Tani, 15 vjet më vonë, mendoj se është e drejtë të themi se ndoshta duhet të zgjerojmë axhendën. Për shkak të axhendës shumë më të gjerë, sot është lufta kundër ksenofobisë dhe diskriminimit, mirëkuptimi i diversitetit dhe lufta kundër ekstremizmit. Dhe gjithashtu, paragjykimet ndaj migrantëve. Axhenda është zgjeruar. Dhe ajo që ne kemi rënë dakord sot është të investojmë pak më shumë në ripërcaktimin e një axhende pozitive për 15 vitet e ardhshme bazuar në përvojën e këtyre 15 viteve të fundit.

Pyetje: Qeveria juaj kishte hapur bisedime me krerët katalonjas, mendoj në fillim të këtij viti pas polemikave të mëdha. Cili është përparimi dhe mënyra e zgjidhjes së kësaj çështjeje?

AGL: Ju mund të mësoni të jetoni vetëm me dallimet tuaja. Nëse e bëni këtë përmes dialogut dhe respektimit të ligjit dhe nëse kjo që ne po përpiqemi të nxisim është një dialog, diskutim, debat, mirëkuptim brenda kufijve të ligjit. Ligji është ajo që na bashkon, është ajo që na bën një vend dhe bashkësi. Por, brenda këtij komuniteti duke përdorur dialogun si mjet për të kuptuar këndvështrime të ndryshme dhe pika të ndryshme dhe kjo qeveri ka thënë gjithmonë se metoda është dialogu dhe ne mbetemi të përkushtuar për këtë.

Pyetje: Pavarësisht tre referendumeve që rezultuan më parë në favor të Mbretërisë së Bashkuar në Gjibraltar, a mendoni se nevojitet një referendum në rajon në epokën pas Brexit-it? Cilat janë sfidat kryesore në kufirin Gjibraltar-Spanjë dhe si do t’i trajtojë qeveria spanjolle këto probleme?

AGL: Ky është një diskutim për Mbretërinë e Bashkuar dhe BE-në. Mbretëria e Bashkuar vendosi të largohet nga BE-ja përmes një referendumi. Ne nuk u pajtuam me rezultatin. Por, ne e respektojmë vendimin që populli britanik solli për vete. Tani, kjo është vetëm gjysma e tregimit. Gjysma tjetër është se çfarë marrëdhënie ka Mbretëria e Bashkuar me pjesën tjetër të BE-së në periudhën pas Brexit-it. Kjo është ajo që ne po përpiqemi të ndërtojmë tani. Kjo prek më shumë individualisht Spanjën sepse ekziston çështja e Gjibraltarit në marrëdhëniet midis Spanjës dhe Britanisë së Madhe. Por, përsëri, për ne në Spanjë, është shumë e qartë. Ne besojmë se sa më e afërt të jetë marrëdhënia midis Mbretërisë së Bashkuar dhe Spanjës, aq më mirë do të jetë, aq më të afërta janë marrëdhëniet midis Mbretërisë së Bashkuar dhe BE-së. Ky është vizioni ynë dhe kjo është ajo që ne po përpiqemi të përparojmë në negociata.

Duhet të kuptojmë se çka dëshiron pala briatanike. A janë ata po aq të interesuar për këto marrëdhënie të ngushta, padyshim që nuk mund të jenë aq të afërta sa të jesh anëtar i BE-së sepse ata kanë vendosur të mos jenë anëtare të BE-së? Topi është në kampin e tyre dhe ne jemi duke pritur të dëgjojmë prej tyre se cila është arsyeja pse negociatat midis BE-së dhe Mbretërisë së Bashkuar po shkojnë shumë ngadalë dhe kjo është arsyeja pse negociatat midis Spanjës dhe Britanisë së Madhe në lidhje me Gjibraltarin gjithashtu po shkojnë shumë ngadalë. Përgjigjja është të telefononi Londrën dhe të mësoni atë se çfarë duan të bëjnë. Sepse akrepat e orës po lëvizin. Ne e dimë se periudha e tranzicionit përfundon më 31 dhjetor 2020. Mbretëria e Bashkuar e ka bërë shumë të qartë se ata nuk dëshirojnë të zgjasin periudhën e tranzicionit përtej 31 dhjetorit. Pra, ne jemi duke pritur të shohim se për çfarë marrëdhënie ata parashikojnë për të ardhmen.

– Luftimi i Islamofobisë në Spanjë

Pyetje: Krimet e urrejtjes dhe intoleranca fetare siç është islamofobia janë në rritje në Spanjë, sipas shifrave të Ministrisë së Brendshme të vendit, ndërsa lëvizjet politike të ekstremit të djathtë gjetën terren në zgjedhjet e fundit në Spanjë. Si do t’i trajtojë qeveria këto çështje shqetësuese?

AGL: Ne duhet të investojmë në arsim, duhet të investojmë në nxitjen dhe edukimin e jetesës në diversitet. Spanja është një vend i larmishëm. Ne jemi të larmishëm si nga gjuhët ashtu edhe nga religjionet dhe ndjenjat. Por, ne kemi nevojë për të ushqyer idenë se ne mund të jetojmë së bashku me këtë diversitet dhe për dialog, e që është ajo që po përpiqemi të bëjmë edhe përmes Ministrisë së Jashtme. Kemi ndërmarrë dialogje specifike me komunitete të ndryshme që i promovojmë përmes rasteve, që do të thotë në shtëpi. Shtëpia për të cilën po ju referohem janë qendrat e mendimit, përmes të cilave Ministria e Jashtme nxit të kuptuarit e njohurive dhe kontakteve midis njerëzve të feve të ndryshme që kanë besime të ndryshme dhe me prejardhje të ndryshme për të mësuar të jetojnë së bashku.

Pyetje: Marrëdhëniet SHBA-Spanjë u tensionuan për shkak të problemit të taksave dixhitale. Si mund të zgjidhet ky problem? A munden Spanja dhe BE-ja të përballen me SHBA-të me këtë çështje?

AGL: Pra, së pari më lejoni t’ju them se marrëdhëniet midis Spanjës dhe SHBA-së janë të shëndetshme dhe ato janë të shëndetshme sepse ato janë afatgjata dhe ato janë me rrënjë të thella. Por, është e vërtetë që si në çdo lidhje, ka gjëra që i pranoni pak më shumë dhe ka gjëra për të cilat nuk jeni dakord. Këtë moment ne nuk pajtohemi me taksimin e aktiviteteve dixhitale të vlerës së shtuar. Kjo është diçka që Spanja si shumë vende të tjera të botës, përfshirë shumë në BE, nuk janë dakord, sepse ne mendojmë se nuk do të jetë korrekte me sistemet tona fiskale. Nuk mund të kemi pjesë të tëra të ekonomisë sonë në pjesën dixhitale, duke mos paguar taksat kur pjesa analoge e ekonomisë po paguan taksat. Tani, për ne, mënyra më e mirë për të vazhduar do të ishte të kuptuarit e OECD-së.

Për një sistem taksimi të aktiviteteve dixhitale me vlerë të shtuar ne do të preferonim të kishim një sistem sesa çdo vend që të ketë sistemin e tij. Kjo është arsyeja pse ajo që ne po bëjmë në promovimin dhe investimin në negociata në OECD. Gjithmonë do të dëshirojmë të vazhdojmë dialogun tonë me SHBA. Kjo është mënyra më e mirë për të menaxhuar fushat ku kemi dallime. Por, në lidhje me këtë unë mendoj se Evropa është e qartë dhe është aq e qartë sa Evropa e ka hedhur idenë e taksimit dixhital në fondin e saj të rimëkëmbjes që u miratua kohët e fundit nga krerët e BE-së si një përgjigje ndaj COVID-19.

Pyetje: Anadolu Agency spanjollisht vepron si një urë lidhëse midis dy kulturave. E ndjekni?

AGL: Më duhet t’ju falënderoj për hapjen e kanalit spanjoll të Anadolu. Unë mendoj se do të kontribuojë shumë në nxitjen e një kuptimi më të mirë të komunitetit hispanik ose spanjoll që flet gjuhën spanjolle në të gjithë botën, një pjesë e madhe e së cilës padyshim është në kontinentin amerikan, në Amerikën e Veriut ashtu sikurse edhe në Amerikën Latine, kështu që është bërë shumë mirë. Mezi pres të lexoj nga ju dhe dëgjoj Anadolu spanjisht.

Kategoritë
BotaLajme

Të ngjajshmet