Maqedoni e Veriut, vazhdohet për 14 ditë gjendja e jashtëzakonshme për shkak të COVID-19

Presidenti Stevo Pendarovski tha se ditët e fundit, për fat të keq, numri i rasteve me COVID-19 dhe numri i vdekjeve po rritet, duke shtuar se ekziston shqetësim serioz për disa komuna.

Presidenti i Maqedonisë së Veriut, Stevo Pendarovski, shpalli gjendje të re të jashtëzakonshme për 14 ditë për shkak të krizës me koronavirusin e ri (COVID-19), e cila do të fillojë nesër, raporton Anadolu Agency (AA).

Sot u mbajt seanca e shtatë e Këshillit të Sigurisë për të diskutuar rrjedhën e gjendjes së jashtëzakonshme e cila ishte shpallur për shkak të pandemisë COVID-19.

Pas takimit, presidenti Pendarovski mbajti një konferencë për shtyp.

Pendarovski tha se ditët e fundit, për fat të keq, numri i rasteve me COVID-19 dhe numri i vdekjeve po rritet, duke shtuar se ekziston shqetësim serioz për disa komuna.

“Duke pasur parasysh zhvillimet e fundit dhe numrin në rritje të personave të infektuar dhe të vdekur, sot do të marr vendim për të shpallur një gjendje të re 14-ditore të jashtëzakonshme që do të fillojë nesër”, tha Pendarovski.

Duke theksuar se vendimi për 14 ditët e reja ka të bëjë jashtëzakonisht me atë që qeverisë t’i mundësohet t’i menaxhojë në mënyrë më efektive efektet e pandemisë në shëndetësi, por edhe ato ekonomike dhe sociale, Pendarovski tha se kjo nuk ka asnjë lidhje me datën e zgjedhjeve parlamentare.

Ai falënderoi shumicën dërrmuese të qytetarëve për respektimin e rekomandimeve tashmë tre muaj, duke shtuar se qytetarët nuk duhen të shkujdesen dhe të vënë në pikëpyetje të gjitha rezultatet pozitive deri më tani në luftën kundër pandemisë.

Duke iu drejtuar qeverisë, Pendarovski tha se tendencat negative në disa komuna nuk duhet të jenë rast për të kthyer masat kufizuese në gjithë territorin dhe për të gjithë qytetarët.

“Autoritetet kompetente dhe ministritë duhet të sanksionojnë të gjithë qytetarët që nuk respektojnë masat, pa përjashtim, plotësisht të pavarur nga përkatësia e tyre etnike dhe fetare”, tha Pendarovski.

Në një porosi për liderët politikë, presidenti i Maqedonisë së Veriut kujtoi se shteti aktualisht nuk ka parlament, se ka një qeveri teknike që ka autorizime të kufizuara dhe se situata është shumë serioze.

“Prandaj, unë kërkoj prej tyre të jenë në kulmin e përgjegjësisë historike dhe të bien dakord për datën e zgjedhjeve të ardhshme parlamentare, në mënyrë që të kemi institucione me kapacitet të plotë dhe legjitimitet politik”, deklaroi ai.

Kujtojmë se Presidenti i Maqedonisë së Veriut, Stevo Pendarovski, shpalli gjendje të jashtëzakonshme më 18 mars të këtij viti, me kërkesë të qeverisë, me qëllim të luftës kundër përhapjes së koronavirusit. Një muaj më vonë, Pendarovski shpalli një gjendje të re 30-ditore të jashtëzakonshme. Më 15 maj, gjendja e jashtëzakonshme u vazhdua edhe për 14 ditë të tjera.

Kategoritë
LajmeRajoni

Të ngjajshmet