Ivanov merr “Dush të ftohtë” në Bullgari, refuzohet nga Borisov dhe Zaharieva

Presidenti Gjorgji Ivanov mer dush të ftohtë në Sofje ku kishte shkuar për të takuar krerët shtetërorë, Presidentin, Kryeministrin dhe shefen e diplomacisë. Ivanov arriti të takojë vetëm homologun e tij bullgar, ndërsa kryeministri dhe ministrja e jashtme i kanë thënë jo këtij takimi.

Vetë qeveria bullgare ka konfirmuar se janë anuluar takimet e paralajmëruara të kryeministrit Bojko Borisov dhe ministres për punë të jashtme, Ekaterina Zaharieva, me presidentin e Maqedonisë, Gjorge Ivanov.

QEVERIA E BULLGARISË

“Nuk dëshirojmë të përzihemi në çështje të brendshme të shtetit fqinjë. Pozicioni jonë është principiel dhe i qartë ashtu edhe i bashkësisë ndërkombëtare. I qartë është qëndrimi i Presidentit të Republikës së Maqedonisë. Qeveria bullgare nuk e sheh të arsyeshme të shfrytëzohet për debat të brendshëm në Shkup. Për të ardhmen dhe zhvillimin e shtetit fqinj është kyçe integrimi në BE dhe NATO dhe ajo nuk duhet të vihet në pikëpyetje”

Ky vendim i kryeministrit dhe kryediplomates bullgare, duket se ka irrituar shumë presidentin Gjorge Ivanov, i cili akuzoi se Bojko Borisov ka mbajtur anë dhe ka vepruar kundër qëllimeve të Bashkimit Evropian.

GJORGJI IVANOV, PRESIDENT I MAQEDONISË

“Borisov nuk është vetëm kryeministër i Bullgarisë, por edhe i vendit që kryeson me BE-në. Bashkimi Evropian ndokund promovon dialog, konstruktivitet dhe bashkëpunim, kështu që me gjestin e tij, ai po merr anë dhe nuk e realizon atë që është edhe qëllim i anëtarësimit dhe kryesimit me BE-në”

Këto komente Ivanov i bëri në konferencën e përbashkët për shtyp me presidentin bullgar, Rumen Radev. Ky i fundit edhe pse priti Ivanovin në takim, shprehu shqetësim për gjendjen e krijuar në Maqedoni në lidhje me marrëveshjen e re për emrin dhe i dha mbështetje kësaj marrëveshje. Ai i ka bërë thirrje Ivanovit që të mos jetë vetëm pjesëmarrës, por edhe udhëheqës në dialogun mes institucioneve në Maqedoni, sepse siç theksoi ai, kjo është kusht i rëndësishëm për arritjen e prioriteteve strategjike- anëtarësim në NATO dhe BE.

RUMEN RADEV, PRESIDENT I BULLGARISË

“Bullgaria e pranon marrëveshjen mes Maqedonisë dhe Greqisë për emrin, posaçërisht për shkak se kjo do t’i mënjanojë pengesat në rrugën e Maqedonisë në BE dhe NATO”.

Përkrahja bullgare për marrëveshjen për emrin, theksoi Radev, është e lidhur strikt me respektimin e marrëveshjes që Shkupi dhe Athina i kanë me Sofjen. /SHENJA/

Kategoritë
LajmeRajoni

Të ngjajshmet