Britani, ish-lideri i Partisë Laburiste, Corbyn, ndalohet të marrë pjesë në grupin parlamentar të partisë

Lideri aktual Starmer tha se Corbyn, me përgjigjen ndaj raportit të Komisionit për Barazi dhe të Drejta të Njeriut (EHRC), minoi përpjekjet e partisë për të rikthyer besimin në luftën e saj kundër antisemitizmit

Lideri i Partisë Laburiste në Britani, Keir Starmer, njoftoi se ish-udhëheqësi Jeremy Corbyn, anëtarësia e të cilit u rikthye pas pezullimit si pasojë e një raporti mbi ankesat për antisemitizëm, nuk do të mund të marrë pjesë në grupin parlamentar të partisë, transmeton Anadolu Agency (AA).

Në një deklaratë në llogarinë e tij në Twitter, Starmer tha se Corbyn, me përgjigjen ndaj raportit të Komisionit për Barazi dhe të Drejta të Njeriut (EHRC), minoi përpjekjet e partisë për të rikthyer besimin në luftën e saj kundër antisemitizmit.

Duke vënë në dukje se komuniteti hebre nuk e miraton vendimin për kthimin e anëtarësisë së Corbyn-it, Starmer deklaroi se në këto kushte, është vendosur të vazhdojë ndalesa për pjesëmarrjen e ish-udhëheqësit laburist në grupin parlamentar të partisë.

Me këtë, Corbyn nuk do të jetë në gjendje të votojë ose të flasë në emër të partisë, pavarësisht se anëtarësia e tij në parlament vazhdon, ndërsa ai do të pranohet si deputet i pavarur në aktivitetet parlamentare.

Në Mbretërinë e Bashkuar, liderët mund të ndalojnë që ligjvënësit e partive të marrin pjesë në grupet parlamentare.

Ndryshe, në raportin e EHRC-së të publikuar muajin e kaluar, thuhej se “Ka pasur dështime serioze në trajtimin e antisemitizmit në kryesinë e Partisë Laburiste dhe një proces joadekuat është zbatuar për të trajtuar ankesat për antisemitizëm”.

Raporti theksonte se ish-udhëheqësi Jeremy Corbyn është përgjegjës për atë që ka ndodhur në kohën e tij.

Ndërkaq, në një deklaratë në lidhje me raportin, Corbyn ishte shprehur se hetimet mbi këtë çështje ishin “bllokuar në burokracinë e partisë”, por se shkalla e problemit është ekzagjeruar në mënyrë dramatike nga kundërshtarët brenda dhe jashtë partisë dhe shumica e mediave për arsye politike.

Pas raportit dhe deklaratave të Corbyn-it, Partia Laburiste pezulloi anëtarësinë e tij deri në finalizimin e hetimit ndaj tij.

Megjithatë, Komiteti Ekzekutiv i partisë, në një mbledhje më 17 nëntor, 19 ditë pas pezullimit, vendosi në favor të vazhdimit të anëtarësisë së Corbyn-it.

Duke reaguar ndaj vendimit, Starmer tha: “E di që kjo është një ditë tjetër e dhimbshme për komunitetin hebre dhe anëtarët e Partisë Laburiste që përpiqen ta trajtojnë antisemitizmin”.

71-vjeçari Corbyn vendosi të japë dorëheqje nga posti i liderit të partisë pas humbjes së madhe në zgjedhjet e mbajtura në dhjetor të vitit të kaluar, ndërsa Keir Starmer u zgjodh si udhëheqës më 4 prill.

Kategoritë
BotaLajme

Të ngjajshmet